प्रीतीचा बागीचा

               केवड्याचा वास 
               तुझा रेशमी श्वास 
               मोगऱ्याचा गंध 
               तुझ्या प्रेमात धुंद 


               अर्धोम्लित कमळ 
               तुझ्या खूप जवळ 
               फुलली रातराणी 
               तुझ्यामाझ्या अंगणी 


               जास्वंदाचे बहु रंग 
               हवा तुझाच संग    
               निशिगंध सफेद 
               असावी तुझ्या कवेत 


               उमलली जाई जुई 
               झाले तुझीच सई
               लालचाफ्याचे फुल 
               पडली कशी तुझी भूल 


                बहरला गुलमोहर 
                सदैव तूच समोर 
                शेवंतीची दाटी 
                तुझे गीत ओठी 


                झेंडूच्या दाट माळा
                तुझ्या गळ्यात गळा 
                फुलली अबोली बोलेना 
                तुझ्याविना करमेना 


                गर्द टपोरा गुलाब 
                तूझा माझा मिलाप 
                असा सुंदर बागीचा                          
                तुझ्या माझ्या प्रीतीचा