या ब्लॉगवर आपले सहर्ष स्वागत !

Thursday 9 February 2012

मी अन तू

मी खळखळनारी नदी 
तू स्थिर समुद्र
मी गहिवरली कातरवेळ 
तू शांत रात्र 

मी भरकटली कविता 
तू तिचा गहिराअर्थ 
मी असह्य किंकाळी 
तू एक हाक आर्त 

मी उमलते कमळ
तू  मंद दरवळ 
मी वारा उनाड 
तू न हलणारे झाड 

मी काळजाची धडधड 
तू ह्रिदयीची कळ गोड 
मी उतरणीचा घाट
तू वळणाची पायवाट 

मी लुकलुकती तारका लोभस 
तू उगवणारा चंद्र सावकाश
मी एक अवखळ कल्पना
तू मनीची गंभीर भावना

वरून दिसले जरी वेगळेपण
एकमेकांसाठीच बनलो आपण
म्हणून मलाही पटते,
तुझे मीपण माझे तुपण
खरच नाही वेगळे आपण 

Monday 6 February 2012

आहे सर्व तरी

आहे सुंदर घर आंगण,
पण रांगोळ नाही.
फुलला छान बगीचा.
तुळस कोमेजून जायी.

आहे सुंदर देव्हारा,
पण देव पारशेच राही.
आहे गाण्यांचा गोंगाट फार,
तुझे गुणगुणणे नाही.

आहे स्वच्छ फरशी,
पण थोडी  धूळ आहे बाकी.
शर्टावरचा  एक डाग,
का तुझी वाट पाही.

ओळखतात सर्व मला,
पण जाणणारे कुणी नाही.
आहेत मानसे  नाती नाही,
घर आहे पण घरपण नाही.

जपले मुद्दाम एक व्यसन,
तुझ्या धाकाची वाट पाही.
तू नसली तरी चालू आहे जगणे,
मग का मन तुझी वाट पाही ?




आपण बदलायला हवं

वेळ आली आहे ,
आतातरी आपण बदलायला हवं
पैसे घेवून मत विकणे थांबवायला हवं

सरंजामशाही डोईजड होत आहे
आपल्या अस्तित्वालाच छेद देत आहे
लोकशाहीच रोप वाढवायलाच हवं
पैसे घेवून मत विकणे थांबवायला हवं

आपलं मत आपली अस्मिता आहे
तीच नसेल तर जगणेच व्यर्थ आहे
आपलं जीवन आता तरी सावरायला हवं
पैसे घेवून मत विकणे थांबवायला हवं

 भाषा चालू आहे अरेरावीची
अस्फुट भावना कोंडल्या मनीची
आता तरी स्वताला उघड मांडायला हवं
पैसे घेवून मत विकणे थांबवायला हवं

आज आपल्या अजून हातात आहे
आज सुपात उद्या जात्यात आहे
आता तरी क्षणाच्या लोभाला आवरायला हवं
पैसे घेवून मत विकणे थांबावायला हवं

अस्वस्थ समाजमन व्यक्त व्हायला हवं
वेळ आली आहे ,
आतातरी आपण बदलायला हवं
खरच मनापासून वाटतं,
पैसे घेवून मत विकणे थांबवायला हवं ........

Friday 3 February 2012

तू अन मी

माझे तुपण
अन तुझे मीपण
खरेच सांग
वेगळे आहोत का आपण


रुतला काटा जरी
वेदना तुझ्या उरी
माझ्यासाठी जगते
मरते  कितीदा तरी.


पाठ फिरवली तरी
ठेवून आशा  न्यारी
तेवत ठेवली ज्योत
दुःखाच्या वादळवारी


आला सांजवारा
वारला दु:खाचा पसारा
माझ्यासाठी जगलीस
हाती घेवून निखारा


कळले मला प्रेम तुझे
तुझ्यासाठी झुरले मनहि माझे
खर सांगतो एकच स्वप्न पहिले
असावे छान घरटे तुझे नि माझे


म्हणून तुला विचारतो
माझे तुपण
अन तुझे मी पण
खरेच सांग
वेगळे आहोत आपण?