आहे सर्व तरी

आहे सुंदर घर आंगण,
पण रांगोळ नाही.
फुलला छान बगीचा.
तुळस कोमेजून जायी.

आहे सुंदर देव्हारा,
पण देव पारशेच राही.
आहे गाण्यांचा गोंगाट फार,
तुझे गुणगुणणे नाही.

आहे स्वच्छ फरशी,
पण थोडी  धूळ आहे बाकी.
शर्टावरचा  एक डाग,
का तुझी वाट पाही.

ओळखतात सर्व मला,
पण जाणणारे कुणी नाही.
आहेत मानसे  नाती नाही,
घर आहे पण घरपण नाही.

जपले मुद्दाम एक व्यसन,
तुझ्या धाकाची वाट पाही.
तू नसली तरी चालू आहे जगणे,
मग का मन तुझी वाट पाही ?